තනියම ඉන්න තමයි වැඩිපුර කැමැති... - GOSSIP9.WORLD

Post Top Ad

තනියම ඉන්න තමයි වැඩිපුර කැමැති...

Share This
දේවිය සුගලා චරිතය සඳහා ඔබව තෝරා ගත්තේ ඇයි?
මම හිතන්නේ මේ චරිතය සඳහා සුදුසුයි කියලා කැලුම් පාලිත අයියට හිතෙන්න ඇති. හේතුව මොකක්ද කියලා මම දන්නේ නැහැ. මාව තෝරා ගත්තා.
මේ රජ කතාවක ප්‍රධාන චරිතයක් රඟපාන පළමු අවස්ථාවද?
ටෙලි නාට්‍යයක මෙවැනි චරිතයක් රඟන පළමු වැනි අවස්ථාව. වීදිය බණ්ඩාර නමින් චරිතයක් කළා. ඒක විකාශය වුණේ නැහැ. චිත්‍රපට නම් කිහිපයකම රඟපෑවා. මහින්දාගමනය, දළදාගමනය, ආලෝකෝ උදපාදී වැනි චිත්‍රපට කිහිපයක රඟපෑවා.
හුඟක් අය කියනවා ඒ කාලේ අධ්‍යක්ෂවරු දිල්හානිගෙන් හරියට වැඩක් ගත්තේ නැහැ. ඒක ඇත්තද?
ඒකේ වරදක් දකින්නේ නැහැ. මම රංගනයට ආවේ කිසිම දැනීමක් නැතිව. රඟපෑ චරිත වගේ හැම අභියෝගයන්ම මගේ ජීවිතයට ලොකු පන්නරයක් ගෙනාවා. ආපහු හැරිලා බලද්දී ඒ හැම දෙයක්ම වුණේ මගේ හොඳට කියලා මට හිතෙනවා.
රූගත කිරීම්වලදී කරන්න අකැමැතිම දේ මොකද්ද?
අකැමැතිම දේ තමයි උදේ, දවල්, රෑ එක දිගට වැඩ කරන එක. ඕනෑම ක්‍ෂේත්‍රයක නිරත වෙන හැම කෙනකුටම ඒ ක්‍ෂේත්‍රයට අදාළව නිදහස කියන දේත් තියෙන්න ඕනෑ. උදේ නම් උදේ, රෑ නම් රෑ. මුළු දවසම වැඩ කරන්න මම ආස නැහැ.
හුඟක් අය රංගන ශිල්පිනියෝ වෙන්න හීන දකින්නේ, රඟපාන එක ලේසියි කියලා හිතලා. ඒක ඇත්තද?
ඔය කතාව සිනමාවට අදාළ නෑ. මොකද සිනමාවේ තැනක් හදා ගන්න ලේසි කෙනකුට බෑ. ටෙලි නාට්‍ය රැල්ලේ ඔය ප්‍රශ්නය තියෙනවා. කටපාඩම් කරලා දෙබස් ටික කොහොම හරි කියාගත්තොත් එයා නිළියක්. හැමෝම හැම ටෙලි නාට්‍යයකම එකම විදියයි. රඟපෑම ලේසි නැහැ. ඒක බොහොම බාරදූර කාර්යයක්.
ඇත්තටම හොඳ රංගන ශිල්පිනියක් වෙන්න සම්පූර්ණ කළ යුතු දේවල් මොනවද?
මුලින්ම තමා කරන කාර්ය නිවැරැදිව හඳුනා ගත යුතුයි. තමන් කවුද තමන් ආවේ මොකටද කියලා හඳුනා ගන්න ඕනෑ. තමා තුළින් තමාව දැකලා තමාව සම්පූර්ණ කර ගත යුතුයි. සමාජය ගැන, මිනිස්සු ගැන අධ්‍යයනය කරලා ඒ චරිත තුළින් රංගනයට යමක් උකහා ගත යුතුයි.
ජනප්‍රිය චරිත අතරින් සාර්ථක විවාහ ජීවිත ගත කරන යුවළක් විදියට ඔබ දෙදෙනා ජනප්‍රියයි. ඒ රහස මොකද්ද?
විවාහය කියන්නේ ඉතාම දුෂ්කර කාර්යයක්. අපි දෙන්නා දෙන්නෙක්. ප්‍රියංකරට යාළුවෝ ඉන්නවා. පාර්ටිවලට යනවා. එයා ගායකයෙක්. මම ඔය සේරගේම අනෙක් පැත්ත. නමුත් අපි දෙන්නා අපි දෙන්නගේ ඒ වෙනසට ගරු කරනවා. අපිට අපිටම වෙන්වුණු පෞද්ගලිකත්වයක් තියෙනවා. පෞද්ගලික නිදහසට ගරු කරනවා.
ප්‍රියංකරගේ සහ පුතාගේ විශේෂ අවස්ථා. උපන් දින කීයක් විතර මඟ ඇරිලා තියෙනවද?
එකම දේ අපේ ගෙදර උපන් දිනවලට පාර්ටිවලට, කිසිම තැනක් නැහැ. අපි දානයක් දුන්නත්, ඒවා කරන්නේ නිහඬව. ළඟදී පුතාගේ උපන් දිනය තිබුණා. අපි කවුරුත් උත්සව ගත්තෙත් නැහැ. ඒවා ෆේස්බුක් දැම්මෙත් නෑ.
හුඟක් අය ෆේස්බුක් පාවිච්චි කරනවා. ඔබට ෆේස්බුක් ගිණුමක් නැත්තේ ඇයි?
මෙහෙමයි ඕනෑම ක්‍ෂේත්‍රයක මාකටින් තියෙනවනේ. තමාව මාකට් කර ගන්න තමයි එහෙම කරන්නේ. මට මා විසින්ම ගොඩනඟාගත් ප්‍රතිරූපයක් තියෙනවා. ඒක මට අමුතුවෙන් හදන්න ඕන නැහැ. ඉතින් මට ෆේස්බුක් ගිණුමක් අවශ්‍ය නැහැ. හැබැයි මගේ නමින් ගිණුම් තියෙනවා. මොකද මිනිසුන්ට තමන්ව ගොඩනඟාගන්න වේලාව නැති වුණාම අනුන්ට ප්‍රතිරූප හදන්න වේලාව තියෙනවනේ.
විවේක වේලාවට මොනවද කරන්නේ?
පොත් කියවන්න කැමැතියි. සති අන්ත පත්තර සියල්ලම වගේ කියවනවා. තනියම ඉන්න කැමැතියි. මට කවදාවත් හොඳම යාළුවෙක් ඉඳලා නැහැ. මොකද ඒක මට කරදරයක්. එයින් මම යන මාර්ගය වෙනස් වෙනවා. මම හුදකලාවට හරිම කැමැති කෙනෙක්.
මාසෙකට කී පාරක් විතර සැලුන් යනවද?
ඔව් යනවා. මම කැමැතියි පිරිසුදුකමට. නියපොතු සුද්ද කරන්න. මම අනිවාර්යයෙන් සැලුන් යනවා. රඟපෑවත් නැතත් පෞද්ගලික පිරිසුදුකම මට හරිම වැදගත්.
බාහිර සම පැහැපත් කර ගන්න ගෙදරදී මොනවද කරන්නේ?
විශේෂ දෙයක් නැහැ. මම අව්වට යන්න නම් කැමැතිම නැහැ. ඉස්සර නම් හරියට පලතුරු කෑවා. වස විස තියෙන කෑම, කෘත්‍රිම කෑම වර්ග ගන්න කැමැතිම නැහැ. කඩෙන් කෑම කනවා හරිම අඩුයි.
හුඟක් අය කියනවා දිල්හානි කවදාවත් වයසට යන්නේ නෑ, මහත් වෙන්නේ නෑ කියලා. මොකද්ද රහස?
ඇත්ත කතාව නම් ඔය කියන සේරම මට වෙලා තියෙනවා. මම ලෙඩවෙලා, ජරාජීර්ණ වෙලා තියෙනවා. හැබැයි මගේ වියපත් බව, මහත පේන්නේ අඩුවෙන්. නමුත් මගේ වයසට අනුව ඒ වෙනස්කම් සියල්ලම ඒ විදියටම වෙලා තියෙනවා.

No comments:

Post a Comment

Post Bottom Ad